Bazuar në kompetencat e Bordit të Federatës së Basketbollit të Kosovës që dalin nga Statuti i FBK-së, si dhe duke u bazuar në Nenin 31 të rregullores së Përfaqësueseve të Kosovës, Bordi i FBK-së ka marrë vendim që të emërojë trajnerin Viktor Kovac në cilësinë e përzgjedhësit të Përfaqësueses A Femrat të Kosovës.

Viktor Kovac është trajner nga Kroacia dhe me përvojë të madhe në kampionatin kroat, ndërsa ka qenë edhe përzgjedhës i Kombëtares së Kroacisë (F), kurse së fundi ai e ka udhëhequr KBF Bashkimin në stolisjen me titullin e kampionit për edicionin 2022/23 dhe 2023/24 në Superliga Femrat, si dhe triumfin në Kupë dhe Superkupë në dy edicionet e fundit.

Viktor Kovac do të udhëheq Përfaqësuesen A Femrat të Kosovës në FIBA Kampionatin Evropian për Shtete të Vogla, që do të organizohet në Prishtinë prej 25 deri më 30 qershor 2024.

Sigal Prishtina është kampione e Ligës Ballkanike. Në një finale dramatike, kanë mundur PAYBL AEL Limassol me rezultat 72:67 (16:12, 14:25, 21:10, 21:20).

Bardhekaltrit triumfuan ndaj skuadrës qipriote që kishte përkrahjen nga tifozët vendas, por kjo nuk i ndali prishtinasit, që të luftojnë deri në fund dhe për herë të tretë në histori të fitojnë këtë garë.

Më herët e kishin fituar më 2015 dhe 2016.

Sa i përket finales, bardhekaltrit e nisën ndeshjen më mirë, duke e fituar çerekun e parë 16:12, derisa periudha e dytë foli në të mirë të qipriotëve 14:25.

Prishtinasit u rikthyen furishëm në pjesën e dytë, përkatësisht periudhën e tretë, që e fituan 21:10, derisa në dhjetëminutat e fundit e ruajtën epërsinë dhe triumfuan me pesë pikë dallim, 72:67.

Shaheed Davis shënoi 16 pikë për kryeqytetasit, Malcolm Armstead dhe Donte Clark shënuan nga 15, kurse 14 shtoi Diamond Stone.

Shaheed Davis është shpallur MVP i Final 4.  

Peja është renditur e treta në këtë garë.

Ka përfunduar seminari dy ditor i organizuar nga Federata e Basketbollit e Kosovës (FBK) për klubet e basketbollit, me temën “Qeverisja e Mirë në Sport”.
Të pranishëm në këtë seminar kanë qenë përfaqësuesit e klubeve të FBK në dy konkurrencat.

Sot ka ligjëruar eksperti Agim Çitaku për dy tema shumë të rëndësishme, Rregullativa Ligjore për klubet sportive në Kosovë dhe Procedurat ligjore brenda dhe jashtë kornizës së FBK-së.

Në fund të seminarit të gjithë të pjesëmarrësit janë certifikuar nga “Academy of Leadership Sciences Switzerland” në bashkëpunim me Federatën e Basketbollit të Kosovës.
Certifikatat janë ndarë nga Sekretarja e Përgjithshme e FBK-së, Elvira Dushku dhe ligjëruesi, Agim Çitaku.

Organizimi i këtij seminari kishte për qëllim fuqizimin e klubeve të FBK-së që është një nga pesë qëllimet e FBK-së në Planin Strategjik 2021-2025, të cilin Federata e Basketbollit të Kosovës e ka hartuar në bashkëpunim me FIBA-n dhe ekspertët e jashtëm të angazhuar nga institucioni më i lartë i basketbollit në botë.
Federata e Basketbollit e Kosovës falënderon përfaqësuesit pjesëmarrës të klubeve, ligjëruesit dhe bashkëpunëtorët e tjerë që ishin pjesë e organizimit të këtij seminari. 

Seminari i radhës për klubet e basketbollit nga FBK në bashkëpunim me FIBA pritet të organizohet në fund të muajit gusht me temën qendrore kushtuar marketingut, digjitalizimit, promovimit dhe vizibilitetit. 

Sot ka filluar seminari për klubet me temën “Qeverisja e Mirë në Sport”, ku të pranishëm janë përfaqësues të klubeve të Federatës së Basketbollit të Kosovës (FBK) në të dy konkurrencat.

Seminarin e ka hapur Kryetari i FBK-se, Arben Fetahu me një fjalë rasti, i cili i ka falënderuar klubet pjesëmarrëse si dhe ligjëruesit, ndërsa ka nënvizuar edhe një herë se një nga pesë qëllimet e Planit Strategjik të FBK-së për vitin 2021-2025 është “Fuqizimi i Klubeve”.

“Qeverisja e mirë në klubet e basketbollit në Kosovë ka një rendësi të madhe për zhvillimin e sportit në vend në përgjithësi. Një qeverisje e mirë siguron transparencë, efikasitet dhe integritet në menaxhimin e klubeve, duke sjellë kështu përfitime të shumta për lojtarët, trajnerët, tifozët dhe të gjitha grupet e tjera të interesit. Qeverisja e mirë në klubet e basketbollit kontribuon në rritjen e nivelit të lojës së basketbollit, promovimin e sportit në vend dhe ndërtimin e një komuniteti të fortë sportiv dhe kjo është arsyeja kryesore që ne si FBK kemi vendosur të organizojmë seminarin me këtë temë në mënyrë që t’i ndihmojmë klubet tona të fuqizohen dhe të rriten edhe shumë”, ka thënë ndër të tjera Fetahu.

Në pjesën e parë të seminarit ka ligjëruar Agim Çitaku për hyrjen në Qeverisjen e Mirë, menaxhimi, strukturimi, lidershipi si dhe parimet e qeverisjes së mirë.

Ndërkaq në pjesën e dytë të ligjëratës është duke ligjëruar eksperti i kësaj fushe, Ennio Bovolenta i cili është fokusuar në integritetin dhe manipulimin në sport, masat parandaluese, kodin e sjelljes së FIBA-së, detyrimet e klubeve rreth “Safeguarding” e kështu me radhë.

Seminari do të mbahet edhe ditën e diel ku në fund përfaqësuesit e klubeve do të certifikohen nga Academy of Leadership Sciences Switzerland” në bashkëpunim me Federatën e Basketbollit të Kosovës.